Ficha 2

O profesor Xosé Nieto Castro e a profesora Virginia González Ferro, ambos docentes de Xeografía e Historia, traballaron a ficha 2 na aula cos diversos grupos de 3º da ESO. 

Os obxectivos desta ficha son:

• Contribuír aos procesos de sexuación da mocidade dun xeito positivo. 

• Achegar e clarificar conceptos relacionados co feito sexual humano. 

• Ampliar a visión da sexualidade no alumnado que favoreza actitudes e condutas saudables e respectuosas. 

• Abrir unha canle de comunicación co profesorado respecto das dúbidas referentes á sexualidade que haxa na aula.

As cuestións principais que os rapaces e rapazas salientaron foron as seguintes:

• Identidade sexual: unha persoa pode ter a identidade sexual que desexe sen que iso supoña ningunha "anomalía".

• Do mesmo xeito, calquera é libre de sentir atracción por persoas de calquera identidade sexual.

• Importancia do emprego dos métodos profilácticos para evitar transmisión de ITS e outras consecuencias non desexadas que poidan ter drásticas consecuencias sobre a vida das persoas (embarazos, etc.).

• Extrema-la precaución respecto das ITS. Se alguén nota algo "raro" respecto do seu corpo, mellor ir ao médico canto antes. Importancia de facerse revisións médicas frecuentes.

• Importancia da cuestión da privacidade persoal e moito coidado ca información que se comparte a través de redes sociais ou aplicacións de mensaxería.

• Os perigos das tecnoloxías da información e da comunicación. Cómpre ter moito coidado con quen te relacionas, sobre todo a través de internet.

• A artificialidade da pornografía. Non confundir ficción con realidade. Un produto de entretemento non é o mesmo que un produto educativo.

• A cuestión da idade de consentimento sexual e os dilemas do paso da adolescencia á vida e o mundo dos adultos.

Foron unhas sesións moi completas e houbo un diálogo aberto nos grupos.